محمد احمد لدھیانوی کو آج بھی جھنگ میں طاقتور شخصیت تسلیم کیا جاتا ہےبلکہ پچھلے دنوں فوجی ہیڈ کوارٹر (جی ایچ کیو) پر جب حملہ آوروں نے کئی اعلیٰ فوجی عہدیداروں کو کئی گھنٹے تک یرغمال بنائے رکھا تو حملہ آوروں سے بات چیت کے لئے فوجی کمانڈروں نے کالعدم سپاہِ صحابہ کے سربراہ محمد احمد لدھیانوی سے جھنگ میں ہی رابطہ کیا اور "مدد" حاصل کی۔

دوسری طرف فیصل آباد میں قائم اہلِ تشیع مدرسہ "جامع آلِ محمد" فرقہ وارانہ قتل و غارت میں اہم کردار ادا کرتا رہا ہے۔  مذکورہ مدسرے کے بانی محمد اسماعیل دیو بندی پاکستان میں فرقہ واریت کے بانیوں میں شمار کئے جاتے ہیں۔ مولانا اسماعیل احمد دیوبندی جیسا کہ نام سے ظاہر ہے شیعہ مذہب اختیار کرنے سے پہلے دیو بندی مسلک سے منسلک تھے۔ ان کے بارے میں مشہور ہے کہ وہ ایک شعلہ بیان مناظر اور خطیب تھے جو اپنے خطبات کے ذریعے "آگ" لگانے میں مہارت رکھتے تھے۔ جب انہوں نے دیوبندی مسلک کو ترک کر کے شیعہ مسلک اختیار کیا تو انہوں نے اپنی اس شعلہ بیانی رخ سنّی عقائد کی طرف موڑ دیا۔ عقیدہ تبدیل کرنے کے بعد انہیں اہلِ تشیع حلقوں میں ہاتھوں ہاتھ لیا گیا اور وہ ہر مجلس میں اپنی تقریر کا آغاز اس جملے سے کرتے کہ "میں بالآخر مذہب حق کی طرف لوٹ آیا ہوں اور آپ سے معافی کا طلب گا ر ہوں کہ میں نے اپنے "ایامِ جہالت" میں آپ لوگوں کی بہت دل آزاری کی اور دینِ اسلام کی اصل شخصیات کو پہچان نہ سکا"۔

مجاہد حسین کی تصنیف "پنجابی طالبان" سے اقتباس۔

"فریزر نے ان کے بارے میں جو تجزیہ کیا ہے وہ دوسری جماعتوں، فرقوں اور گروہوں سے انہیں مختلف کر دیتا ہے۔ مثلاً ان کے ہاں کوئی مذہبی طبقہ نہیں ہے، کوئی مذہبی کتاب نہیں ہے کہ جو ان کی اخلاقی قدروں کو متعین کرے۔ کوئی استاد اور راہنما نہیں ہے کہ جو ان کی نسلی روایات کی نگرانی کرے ان کی زبان کا کوئی ایک معیار نہیں ہے۔ ہمیشہ خانہ بدوشی اور گردش میں رہنے کی وجہ سے جہاں جاتے ہیں وہاں کی زبان کے الفاظ ان کی زبان میں آجاتے ہیں۔ خاص بات یہ ہے کہ واپس جانے کے لئے ان کی کوئی سرزمین نہیں، ہندوستان سے انہیں کوئی دلچسپی نہیں ہے، اور نہ ہی وطن کے بارے میں ان کے ہاں ناستلجیا ہے۔ یہی حال ان کا تاریخ سے دلچسپی کا ہے۔ کیونکہ ہمیشہ پھرتے رہتے ہیں۔ اور کسی ایک جگہ سے تعلق نہیں، اس لئے یہ کسی قوم یا سرزمین کی تاریخ کا حصہ بھی نہیں ہیں۔ نہ ہی انہیں اپنی تاریخ سے کوئی لگاؤہے اور نہ ہی ماضی سے اپنہ رشتہ بناتے ہیں۔ ان خصوصیات کی وجہ سے جپسی گروہ ایک ایسے کردار اور خصوصیت کا حامل ہے جودوسروں کے ہاں نہیں ہیں۔"

ڈاکٹر مبارک علی کی تصنیف "بدلتی ہوئی تاریخ"سےاقتباس۔